港警針對流亡民運人家屬；法院拒批《榮光》禁令；批評港府時政專欄被抽起

今期焦點

• 香港警方拘留同盤問流亡民運人嘅親屬
• 親共《東方》抽起批評港府時政專欄
• 武術教練因Facebook po被判煽動罪
• 聯合國報告譴責中共騷擾黎智英個仔同法律團隊

法治

• 香港警察拘留同盤問流亡民運人嘅親屬：7月初， 香港警察懸紅100萬港幣（127,700美元）通緝八名流亡民運人同前議員。不出幾日，國安警開始問拘留同盤問呢八人住喺香港嘅親友，類似行動維持咗成個夏天。7月18號，帶走咗專注維護勞工權益嘅蒙兆達嘅家人助查，兩日之後，又帶走律師兼前議員郭榮鏗嘅家人。8月8號，華盛頓港人組織負責人郭鳳儀嘅父母亦被帶返警署。除咗呢八名主要目標之外，流亡德國嘅社運人鄺頌晴嘅家人亦被國安警上門調查，住處被搜。警方發言人同傳媒講，「唔排除其他執法行動，包括逮捕。」而大多數受騷擾嘅人喺警方盤問後獲釋。到目前為止，最大動作嘅行動係國安警8月底突擊搜查羅冠聰家人住所後，正式拘留咗佢阿嫂。
• 警方拘捕協助已解散612人道支援基金嘅人：警方對流亡民運人親友嘅騷擾，似乎係一個更大行動嘅一部分，目的係切斷流亡人士同香港親友剩餘嘅聯繫。8月10號，警方以「嫌串謀勾結外國或者境外勢力危害國家安全罪」，拘捕10人，指控佢哋曾協助已解散嘅612人道支援基金運作。612人道支援基金旨在幫助2019年因參與反修例運動急須唔同支援嘅示威者，運作包括收取海外捐款、向流亡海外嘅示威者提供經濟援助。舊年，基金嘅六名前信託人被拘捕同罰款。
• 《國安法》最低刑期下唔可以再減刑：8月22號， 終審法官駁回坐緊監嘅大學生呂世瑜就刑期嘅上訴。呂世瑜承認喺Telegram發布「分裂國家」信息，按香港普通法體系慣例要求減刑。幾個法官一致駁回上訴申請，重申《國安法》下嘅「嚴重罪行」必須最低判刑五年，為之後類似嘅個案立下先例。

新聞自由

• 親共《東方》抽起批評港府時政專欄、推廣廣東話組織停運：8月14號， 親共報紙《東方日報》宣布抽起批評港府時政嘅專欄《功夫茶》。兩星期後，推廣廣東話嘅組織「港語學」嘅創辦人被國安警冇搜查令下搜屋，及後宣布停運組織。佢地登咗一篇參加過2020年寫作比賽嘅末世科幻小說節錄，之後就被搜。
• 政府司法報告消失：香港當局採取新措施減少政府透明度，公開資料繼續消失。7月28號，網媒香港獨立媒體報道，律政司刪除咗2020年之前嘅所有年度報告。由於有海外港人組織呼籲國際制裁以《國安法》同其他法例起訴社運人同抗爭者嘅檢控官，相信律政司刪除年報，係為咗保護檢控官嘅身分。而2020年之後嘅報告仍然公開俾大家睇，但幾乎都冇相嘅。

網絡自由

• 因Facebook po被判煽動罪：63歲嘅武術教練江達權，因為喺Facebook出po批評中共，如實話中共係強權，7月27號，被以殖民時代嘅煽動罪判監三個月。江係判刑前一日認罪，承認自己喺Facebook po咗相關嘅文同圖。總部喺華府嘅香港民主促進會話「大多數香港人都會同意呢啲觀點」，明顯呢個案例有可能係用嚟殺一警百同滅聲。

學術、藝術自由

• 被拒入境嘅海外藝術家有可能被控：喺最新兩宗同外國人入境情況有關嘅個案中，攝影教授Matthew Connor來自麻省藝術設計學院（Massachusetts College of Art and Design），佢喺2019年紀錄過香港嘅反修例運動之後，於今年8月16號第二次被拒入境香港。呢件事有可能同丹麥藝術家兼《國殤之柱》創作者高志活（Jens Galschiot）事發前五日寫過信俾香港當局，嘗試證實佢係唔係好似親共傳媒報道咁、被通緝有關。

抗爭行動特寫

• 法院拒批《榮光》禁令：呢個係一個司法反制嘅例子，呢啲情況而家喺政治敏感嘅案件中已經越嚟越少見。7月28號，香港高等法院駁回政府要求禁止播放抗爭歌《願榮光歸香港》嘅禁令申請，理由係呢個禁令會產生寒蟬效應、破壞言論自由。自從《榮光》喺幾個體育賽事入面被當係香港嘅國歌咁播放，而唔係播中國嘅國歌後，港府就嘗試阻止呢首歌喺網上流傳。好多香港人喺網上慶祝呢個突然公正嘅裁決，不過都有人擔心呢個勝利可能係短命種，因為8月23號，法院又批咗上訴許可俾律政司，仲排咗喺9月13號審。
• 美國國務院同聯合國報告、譴責中共騷擾民運人喺香港同海外嘅家人：8月25號，美國國務院發表聲明，「強烈譴責香港政府持續騷擾海外香港民運人喺留港家人」，同時呼籲港府停止呢啲騷擾行為。另外，9月28號，聯合國秘書長辦公室向人權理事會提交報告，討論各國同聯合國喺保障人權方面嘅合作，同時譴責有人騷擾黎智英個仔──黎崇恩同佢嘅國際法律團隊、作為報復嘅情況。報告指佢哋面對親共傳媒嘅攻擊、死亡威脅、網上監視同網絡攻擊。

持續監察事項

• 起訴流亡民運人喺香港嘅家人：過去兩個月內，唔少流亡民運人喺香港嘅親友被帶返警署助查、部分被拘留。我哋可以留意呢啲人入面，有冇人以《國安法》或其他法例被起訴。如果有，佢哋被指控犯咗咩罪，同埋法官有冇嘗試抵抗政府呢種明顯政治化嘅集體懲罰。
• 假資訊抹黑香港民運人同支持者：自6月起一系列嘅調查同曝光嘅假資訊事件，可以見到北京喺外國宣傳假資訊嘅戰術變得更具侵略性同更加複雜。其中加拿大政府喺8月揭露嘅宣傳行動，係關於一個WeChat account喺網上宣傳假資訊，企圖抹黑國會議員莊文浩（Michael Chong）。莊嘅父親喺香港嚟，佢一直大力批判香港同中國被打壓嘅情況。民主國家嘅官員對呢啲宣傳行動嘅關注逐漸增加，最近美國國會美中經濟暨安全檢討委員會，喺一次聽證會入面，聽取莊嘅證詞就係一個例子。請大家留意各大平台上宣傳假資訊嘅新證據，呢啲活動企圖抹黑香港民運人或佢哋嘅支持者。順便留意埋科技巨企同外國政府事發之後嘅回應。