六四限制；記者庭上勝訴；歐盟決議

今期焦點:

• 天安門大屠殺紀念活動受限
• 記者罕見贏得上訴
• 抗爭歌禁令或催化網絡政治審查
• 香港人喺英國被毆打，活動被取消
• 歐洲議會通過關於《國家安全法》嘅決議

法治

• 記者罕見贏得上訴：獲獎記者蔡玉玲早前被判於 2021 年 4 月，喺政府網上車牌查冊系統明知而作出虛假陳述罪成。蔡不服上訴至終審法院（終院），今年6月5日終院判蔡上訴得直，推翻定罪。蔡喺2019年任職香港電台 (RTHK) ，佢透過車牌查冊調查喺元朗站無差別襲擊西鐵乘客嘅施襲者身分，喺查冊原因選項中，佢選擇咗「其他有關交通及運輸的事宜」。終院認為，「其他有關交通及運輸的事宜」理應包括「真誠的新聞調查」，因蔡喺調查過程中選擇呢個原因而對佢定罪係「嚴重不公」。傳媒界正面臨煽動叛亂罪同國安法各項起訴，呢一個裁決對香港記者嚟講，係一次罕見嘅勝利。不過，裁決兩星期之後，即 6 月 19 日，三個上訴庭法官駁回傳媒大亨黎智英就警方搜查令提出嘅司法覆核，該搜查令容許警方檢視黎手機內嘅新聞材料。而黎智英將會喺九月，因國安罪名受審。
• 針對少年犯嘅「去激進」計劃：6月8日，《華盛頓郵報》發表對香港監獄政治犯，特別係21歲以下青少年待遇嘅調查。報告根據對囚犯、前守衛嘅採訪， 仲有其他官方文件，揭發一項去激進計劃（官方稱為「定向改造」），目的係改變囚犯嘅政治觀點。佢哋嘅策略包括每日睇中共政治宣傳影片、親中講座，同時配合各種懲罰包括強迫道歉、單獨監禁、限制同屋企人交流、以及間中毆打等等。雖然暴力程度比較上算低，但都令人聯想到中國大陸針對異見人士、藏人、維吾爾人、同法輪功學員實施嘅再教育同「改造」計劃。

新聞自由

• 愛國嘉年華取代64燭光晚會，記者被捕：幾十年嚟，香港係中華人民共和國唯一一個可以公開悼念89年天安門事件嘅城市，每年6月4號晚，過萬人會聚集喺維園舉起燭光。2020年，新冠疫情期間，《國家安全法》(NSL)獲通過，香港政府自始禁止燭光晚會。今年，維園改辦由26個親北京團體舉辦、為期三日嘅嘉年華活動。同日，警方以擾亂「公共秩序」為由，拘留至少23名試圖紀念事件嘅市民，其中包括兩名計劃絕食嘅市民同兩位藝術家，一人喺被警察帶走時高叫「毋忘六四！」，而維園附近有超過6,000個警察駐守。當日至少有一名記者被拘留，被捕記者係法國國際廣播電台嘅自由業記者及香港記者協會（HKJA）前負責人麥燕庭，佢喺嘗試報道嘉年華嘅時候被警察無故拘留，後來被無條件釋放。

網絡自由

• 抗爭歌禁令或催化網絡政治審查：6月5日，香港政府向法院申請禁令，禁播2019年反修例抗爭歌《願榮光歸香港》。近幾個月，呢首歌三番四次被誤當香港國歌，喺國際體育賽事播出，激嬲咗政府。高院6月12日開庭後，法官將申請押後至7月21日再審。但其實之前已經有新聞報道指，香港版iTunes、Spotify同Facebook，已冇辦法搵到呢首歌；亦有報道話，事件同各大平台冇關，係發行商下架首歌。如果禁令真係獲批，不論線上線下，呢首歌都唔可以再喺香港境內表演或傳播。專家憂慮呢個禁令會點樣執行，亦擔心禁令會擴大對網絡自由嘅限制，例如遲啲可能連放喺中國網域以外嘅《願榮光歸香港》都要下架。

學術自由及藝術自由

• 關於天安門屠殺嘅調查，民主派歌手演唱會被取消：一間民意調查機構被政府警告後，喺最後一刻取消咗對香港人進行有關六四嘅年度調查，可見政府對六四嘅態度變得更謹慎。另外，5月25日，民主派著名歌手黃耀明原定8月舉行嘅演唱會，喺冇任何解釋嘅情況下被香港會議展覽中心取消。據報，黃耀明曾經試訂多個場館，但都唔成功，令佢喺2021年12月之後都再冇辦法喺香港演出。

香港以外

• 香港人喺英國被毆打，活動被取消：6月11日，紀念2019年反修例民主運動週年嘅集會舉行期間，香港示威者被一班中國人襲擊。喺社交媒體流傳嘅片段見到，三個中國男人喺修咸頓（Southampton）對兩個香港男女拳打腳踢。當地警方話佢地正循「仇恨襲擊」調查事件。片段睇到，其中一個襲擊者一邊用普通話大叫「香港屬於中國」，一邊手搖中國旗。後來據說有另一條片喺微信流傳，班懷疑係喺修咸頓大學讀書嘅襲擊者，好威咁討論呢次襲擊。另外，喺5月底，據幾個支持香港嘅團體所講，吉爾福德（Guildford）一個當地教會喺最後一刻收回一個《羊村》繪本教育活動嘅場地許可，活動被迫取消。《羊村》嘅作者大部份係言語治療師，佢哋都喺上年9月因為煽動罪被監禁。教會話，佢哋收回許可嘅原因係教會「由不同國籍嘅人組成」，意味擔心活動會冒犯嚟自中國嘅教友。不過呢個教會以往都舉辦過政治敏感嘅活動，包括關於烏克蘭同巴基斯坦嘅活動。

抗爭行動特寫

• 本地同海外港人紀念六四：公開紀念天安門事件嘅限制越嚟越多，但仍有唔少港人自行點起燭光紀念，例如喺舖頭櫥窗低調點起蠟燭，又或者喺公眾地方睇有關六四嘅書。一啲海外港人亦有參與中國抗爭者嘅紀念活動。另外，廣東話舞台劇《5月35》（用嚟避開審查嘅另類六四講法）唔能夠喺香港演出，轉咗喺台灣以國語舉行首演。
• 《香港自由新聞》獲新聞獎：《香港自由新聞》（HKFP）6月15日喺有亞洲普立茲獎之稱嘅「SOPA亞洲卓越新聞獎」獲得卓越評論獎嘅榮譽獎。獲獎記者Yuan Chan喺2022年嘅新聞自由日發表咗一篇專欄文章，講述記者喺傳媒界受攻擊時嘅勇氣。上個月，發表喺《香港自由新聞》嘅一張相亦都拎咗人權新聞獎嘅榮譽獎。
• 歐洲議會通過關於《國家安全法》、黎智英案嘅決議：歐洲議會喺6月15日以483票贊成、9票反對、42票棄權，通過咗一項「關於香港基本自由倒退，特別係黎智英案」嘅緊急決議。呢個決議目的係想香港當局廢除《國家安全法》，立刻無條件釋放黎智英同其他民運人士。決議仲提到想歐盟成員國採取行動，例如暫停同香港及中國嘅引渡協議，並對有關嘅官員實施制裁。

持續監察事項

• 回歸紀念日前後，關於《國家安全法》嘅拘捕同審查活動增加：64天安門事件紀念日之後，仲有兩個敏感日子：一個係6月30日係北京通過《國家安全法》三週年，另一個係7月1日香港回歸中國26週年。我哋應留意呢啲日子前後，加強咗嘅國安措施、拘捕社運人嘅行動、同網絡審查情況，仲有國際社會對香港同北京政府，就放寬對政治權利同公民自由限制嘅呼籲。
• 被捕日本女學生嘅情況：據6月18日嘅報道，23歲嘅袁靜婷喺日本讀書期間返港因《國安法》被捕同起訴。佢被捕嘅原因同佢喺日本嘅時候，喺社交媒體出po提到香港獨立有關。另外，三個青年男子喺2019年警方圍攻理大示威者時被捕，月初被判暴動罪成立。法院判處最高五年兩個月嘅監禁，被定罪嘅其中一人自稱係校園嘅攝影記者。請大家關注以上案件，包括起訴袁靜婷對《國安法》海外法權嘅意味，仲有喺9月開審嘅黎智英案嘅進展。
• 民主派媒體嘅財務問題，香港記者協會：由已結業《蘋果日報》嘅記者創辦嘅網上粵語民主派新聞媒體Channel C，6月初宣布面臨財務困難，有可能破產，佢哋呼籲讀者課金訂閱。據報道，呢個媒體喺唔同社交媒體平台上有超過200萬名粉絲，但係喺政府政治審查下收入非常少，佢哋話如果冇辦法籌集到足夠嘅資金，可能最快7月就要結業。而歷史悠久嘅香港記者協會，因自2019年傳媒結業潮，加上記者生存環境惡劣，會員人數不停下跌，同樣面對財政壓力。請持續關注呢兩個團體嘅去向，仲有事情發展對讀者同記者嘅影響。