懸紅緝流亡社運人 ; 民間電台關閉 ; 愛國主義教育法

今期焦點

• 香港警方懸紅緝拿流亡社運人，並拘留其親友
• 香港電台刪除更多內容，民間電台封咪
• 日本記者被拒絕入境
• 美國立法關閉香港駐美經貿辦有進展
• 圖書館系統呼籲公眾舉報「危害國家安全」嘅書

法治

• 在港社運人因支持被通緝流亡社運人被補：7月5至6日，香港國安警拘捕咗五名26至28歲嘅社運人，呢幾個年輕人大部份係2020年已解散嘅香港眾志嘅前成員。警方話，佢哋喺社交媒體上發布咗具有「煽動性」嘅信息，並且一直通過名為「懲罰Mee」嘅App向同情佢哋嘅企業同客戶集資，再用呢啲資金去支持流亡社運人，其中包括喺英國嘅羅冠聰（Nathan Law）。佢哋被捕兩日之前，香港警察發出通緝令，懸紅100萬港幣（12.77萬美元）通緝羅冠聰同其他七個流亡港人。佢哋因為爭取香港自由同制裁侵害人權嘅官員，被指「勾結外國勢力」同煽動分裂國家、觸犯《國安法》。7月8日，美國之聲（Voice of America）報道，相信「懲罰Mee」停止運作同拘捕行動有關，同時亦係想保護嗰啲通過App買嘢或贊助活動嘅人，免得佢哋被起訴。另外，香港本地傳媒報道，7月11日警方帶走羅冠聰嘅父母及兄長問話，佢地隨後獲釋放。 

新聞自由

• 香港電台刪除內容，民間電台關閉：有報道話，2020年以嚟受到政府嚴格控制嘅公共廣播公司香港電台（港台），刪除咗幾千集被認為政治敏感嘅舊節目。據自由亞洲電台所講，截至6月21日，喺港台Podcast One網站上嘅昔日重溫內容入面，30年來深受歡迎嘅諷刺時事節目《頭條新聞》全數下架；另外有關1989年天安門大屠殺、警暴相關嘅部分節目、仲有最近被《明報》解約嘅政治漫畫家尊子嘅作品，都一一被刪除。除此以外，廣東話網台民間電台因被當局凍結咗銀行戶口而要停運，6月30日播出最後一集後封咪。民間電台喺2005年成立，以批評政府嘅phone-in節目而為人熟悉。電台嘅合伙人提到，由於資金緊拙已經冇辦法再交租，又話「即使我哋邀請嘉賓參加節目，佢哋都唔能夠暢所欲言，因為紅線已無處不在」。
• 日本記者被拒入境：6月29日，日本自由記者兼《香港抗爭紀事》作者小川義明被拒入境，隔日被迫返回東京，警方對事件冇任何解釋。 再早前嘅12月，一名日本攝影師被拒入境；6月頭，另一名日本街頭藝人同樣被禁止入境。不過，小川就係第一個被拒入境嘅日本記者。

網絡自由

• 男子因在網上發表港獨言論被捕：63歲嘅武術學校創辦人江達權（Danny Kong），喺6月26日被香港警察拘捕。據稱佢喺2022年12月至2023年6月期間，喺Facebook出po鼓吹港獨同台獨，發布「 煽動性信息」。控方指，呢啲信息嘅目的係煽動對政府嘅仇恨。呢單案當局引用咗殖民地時期嘅煽動叛亂法，呢條法例其實已經冇用超過半世紀，直到2020年先重新用返，今次用嚟起訴社交媒體上出po嘅網民，係最新嘅案例。

抗爭行動特寫

• 持續進行記者、外國記者统計調查：7月7日，香港記者協會（記協）公布香港新聞自由狀況嘅年度調查結果，受訪者係新聞從業員同埋公眾。報告指，2022年嘅新聞自由程度有所下降，雖然下降速度較上一年度慢咗，但整體評分係自2013年嘅新低。受訪者指出幾個下跌主因，包括傳媒對批評中央政府多咗顧忌、記者受到上級或其他自我審查形式嘅壓力。呢個調查結果，同7月5日公佈嘅另一個外國記者調查報告好相似：83%嘅受訪者認為喺過去18個月採訪環境變得更惡劣；88%嘅人就話「發現身處喺香港嘅消息人士變得唔多想討論敏感話題，亦唔願意被引用言論。」呢一個趨勢「清楚表明社會嘅恐懼程度」。幾個受訪者表示曾受到網絡或人身監控，65%嘅受訪者就承認曾經自我審查。
• 美國立法關閉香港駐美經貿辦有進展：7月13日，參議院外交關係委員會通過由參議員盧比奧（Marco Rubio，R-FL）同默克利（Jeff Merkley，D-OR）提出嘅兩黨立法，將會關閉香港駐美經貿辦事處。自從2020年通過《港區國安法》之後，美國政府唔再承認香港嘅自治地位，議員都主張香港駐美經貿辦唔應該再享有豁免權以及其他特權。呢個法案下一步將會交到參議院全體會議表決，眾議院亦已提出咗兩黨嘅配套立法。

持續監察事項

• 跨國追捕八名被通緝嘅流亡社運人：香港警方喺7月3日宣布懸紅通緝八名流亡海外嘅社運人同前立法會議員。請關注之後嘅任何追捕行動，例如國際刑警組織（Interpol）嘅「要犯通報」(Notice）。另外，亦要關注同中國關係密切嘅國家，呢啲國家或者會採取行動拘留或者引渡流亡人士，亦有機會因為指控同埋懸紅而限制佢哋出入境，或進行人身攻擊；同時亦需要留意香港警方有冇向任何人發出賞金。
• 草擬緊嘅《愛國主義教育法》或伸延至香港：6月26日，中國大陸新嘅《愛國主義教育法》已交到全國人民代表大會常務委員會，公眾資詢日期至7月27日。呢個立法草案包括要堅定擁護中國共產黨為國家嘅領導，並大概講咗愛國主義教育部門喺全國各級政府機關嘅職責，當中亦提到香港及海外華人嘅愛國主義教育部門。草案亦提到會將意識形態控制同課程，編入教育系統；呼籲傳媒以「創新宣傳報導方式」去報道「愛國」主題；又要求網上資訊內容製作人「生動咁開展愛國主義教育活動」。請關注呢個法案嘅發展，同埋若通過，香港教育局及傳媒會採取乜嘢措施配合。
• 新增舉報危害國家安全書藉嘅途徑：7月6日，香港公共圖書館系統嘅監管部門公布，將會推出新嘅途徑俾公眾舉報內容可能有問題嘅藏書。根據佢哋列出嚟嘅清單，不良內容唔單止包括暴力同色情，仲包括「危害國家安全」一項。早喺5月，香港圖書館已經將一系列政治敏感嘅書下架，之後呢項新政策就隨即上場。請繼續關注往後嘅審查範圍，以及喺其他場所或政府部門，會唔會實施同類政策。