民主派47人初選案審訊；外國科技產品自我審查；網媒《棱角The Points》創立

今期焦點：

• 47人初選案開審，16個被告就「顛覆國家政權罪」嘅指控唔認罪，成最大單嘅國安案
• 公共廣播電台及電視台，每周需播放30分鐘宣傳國安嘅内容
• 外資公司對喺香港經營越嚟越謹慎，蘋果和迪士尼自我審查旗下科技產品
• 24小時海外網絡新聞媒體《棱角The Points》創立

民主派47人初選案審訊；外國科技產品自我審查；網媒《棱角The Points》創立

上個月，大陸突然結束清零政策，香港封關近三年後重新全面開關。拖咗兩年嘅民主派47人初選案終於喺2月6日開審，被告包括2020年民主派立法會議員、記者、同其他維權人士嘅審訊，被告中只有16名被告唔認罪。香港記者協會警告，外國記者進入香港有愈嚟愈多阻礙。同時，政府已下令公共廣播電台及電視台，每周需播放30分鐘宣傳國安嘅内容。一群分散喺世界各地、嚟自已解散嘅《蘋果日報》同其他獨立媒體嘅記者，喺外地創立咗新嘅網媒《棱角The Points》，同時反映出香港不斷惡化嘅新聞自由狀況、及香港記者嘅頑強嘅意志。過去一個月關於法治和新聞自由的其他更新包括：

法治

• 民主派初選案審，成香港最大單國安案：2021年1月被捕嘅47名民主派立法會議員、維權人士和學者，於2月6日開始受審。 佢地因組織或參與2020年7月舉行嘅非正式初選，而面臨「顛覆國家政權罪」，當中只有16名被告唔認罪。 大多數被告冇得保釋，仍然被羈留喺監獄，包括學運領袖黃之鋒、同資深記者毛孟靜。呢種長時間嘅審前羈留，喺以前嘅香港係唔常見嘅，印證咗國際法律專家早前就《國安法》未來發展嘅警告：包括保釋門檻更高，同案件透明度會愈嚟愈低。另外，有民主派人士質疑，同親政府團體有關嘅排隊黨為左阻礙公眾旁聽案件，於開審前一晚就開始喺法院排隊，霸佔旁聽席位置。
• 「煽動罪」和案件更新：殖民時代留落黎嘅煽動及叛亂條例由2020年開始被廣泛使用，香港人繼續面臨拘捕同控告。上月，香港警察喺一個由兩個支持民主嘅組織舉辦嘅市集，拘捕咗六個人，他們被指控製作及出版一本有關香港反修例運動的「煽動」刊物。根據ChinaFile嘅數據，截至2022年12月，至少有63單案被控「煽動罪」。律政司檢控專員喺一場去年10月已開審嘅「煽動罪」審訊（立場新聞案）中，對現已停運嘅《立場新聞》嘅前總編輯──鐘沛權進行咗30幾日嘅盤問。 辯方稱控方嘅盤問係無止境，並批評審訊有違反正當程序嘅情況，包括控方喺2月初最後一刻提交了四箱新證據。 

新聞自由

• 外國記者入境嘅障礙增加：日本攝影師 Michiko Kiseki去年嘗試入境香港時，被入境事務處問及過去一個牽涉香港反修例運動嘅相展，12月30日佢正式被拒入境。香港記者協會形容Kiseki嘅個案「令人震驚」，又話佢係自2018年以來，第四位被拒入境嘅外國記者。
• 新廣播規例要求推廣國安法；壹傳媒聯交所除牌：政府於2月14日宣布新嘅發牌要求，日後香港嘅三家公共電視台同兩家電台，每周至少播出30分鐘宣傳《國安法》同《國民教育》嘅節目。從呢個新規例，可以見到政府2021年初打擊獨立傳媒後，致力透過愛國主義教育活動「再教育」香港人（尤其是年輕一代）。另外，壹傳媒股份自2021年6月、被警察突擊搜查公司總部後被停牌，未能及時復牌。今年1月12日，香港聯合交易所以「未能遵守香港證券交易所嘅復牌指引」為由，將壹傳媒有限公司除牌。但金融專家認為，此舉係出於政治動機；壹傳媒前老闆黎智英係英國公民，佢既外聘律師喺除牌發生前幾日同英國外交部會面，討論黎智英正面對嘅法律案件。黎智英因涉嫌違反《國安法》待審，同時因欺詐、與抗爭運動有關嘅定罪而服刑。

網絡自由

• 外資公司積極加強自我審查：舊年12月30日，香港用户發現GitLab被蘋果嘅Safari瀏覽器嘅「安全瀏覽」封鎖咗，而GitLab喺中國大陸係一直被審查嘅網站。呢件事明顯係蘋果將向來只用嚟審查大陸互聯網瀏覽活動嘅「騰訊黑名單」，延伸到審查香港Safari用戶。「安全瀏覽」功能本來係用嚟保護用戶免受黑客惡意攻擊，但蘋果Safari用由騰訊管理嘅過濾器，就會執行中共的審查制度，封鎖中國政府唔認可嘅網站。呢個「安全瀏覽」功能2019年喺大陸實施時，仲引發咗私隱憂慮。分析話，呢個功能仲可能會將用戶數據傳送到受中國數據安全法規管嘅騰訊（該法規定政府有權要求騰訊交出數據）。呢件事係外資公司喺香港實行中國大陸政治審查制度嘅一大例子。 唔止蘋果，迪士尼香港串流服務今年2月初亦下架咗《The Simpsons》中提到中國「強迫勞動營」嘅一集。而舊年11月，佢地亦從Disney+香港下架咗另一集提到提到天安門大屠殺的《The Simpsons》。

抗爭行動特寫

• 海外記者創立24小時網媒：今年一月，一班曾經喺《蘋果日報》、《香港電台》、《有線新聞》、及《壹周刊》等媒體做過嘅記者，創立咗名為《棱角The Points》嘅網媒。呢個新網媒嘅名係嚟自於佢嘅座右銘：「亂世之中，專業求真，堅守棱角，黑白分明」。佢嘅創立目的係為咗填補香港獨立媒體迅速消亡後留下嘅報道空白，記者會從香港、台灣、英國、澳洲、英國同加拿大進行報道。最近嘅文章有愈嚟愈多香港人有興趣嘅新聞，包括中國大陸嘅貪腐案、最近交到聯合國嘅香港人權報告、加拿大政府披露嘅中國間碟活動、及對香港新嘅「高端人才通行證計劃」嘅調查報道。
• 國際非政府組織向聯合國審查提交報告：「蘇格蘭香港人」係一個為散居蘇格蘭嘅香港人服務嘅民間組織。呢個組織向聯合國提交咗一分報告，講述《國安法》通過後香港人嘅人權受侵犯嘅情況。佢地仲提出，親北京嘅團體試圖以人海戰術參與2月15日至16日「聯合國經濟、社會和文化權利委員會（UNCESCR）」對中國嘅審查會議，以美言為香港同中國嘅情況洗白。 研究人員指出，喺上一次審查（九年前）中，冇一個組織對香港嘅情況提供正面報告。但呢次30份報告中，有一半以上都係正面嘅。
• 「諾貝爾和平獎」提名：美國國會及行政中國委員會提名六位致力維護人權同法治嘅香港人，為今年「諾貝爾和平獎」嘅候選人，包括黎智英、天主教榮休主教陳日君樞機、鄒幸彤、何韻詩、李卓人、及黃之鋒。

持續監察事項

• 「你好，香港！」旅遊活動： 香港行政長官李家超啟動咗一場華麗、但被瘋狂嘲笑嘅 「你好香港！ 」旅遊活動，包括送機票、音樂會、同新展覽。 由於抗疫政策嚴厲，由2019年底到2022年，香港嘅遊客量少咗95%。 李家超同其他官員近排嘗試說服國際社會：香港仍然處於優勢地位。佢亦反駁負面新聞，如舊年香港經濟萎縮3.5%嘅消息。同時，香港嘅親中官員表明佢地會繼續打壓新聞自由同公眾異議。喺接受親中報紙《商報》訪問時，李家超重申佢正致力推動極具爭議性嘅 「假新聞法」，亦會喺今年底前完成對香港《基本法》第23條嘅第二次修訂草案；該條例規定香港要制定自己嘅國安法。李家超以存在敵對嘅「外國代理人 」，作為必須制定呢啲法律嘅理由。基於政府將繼續打壓公民社會，另一邊箱又想努力挽救受重創嘅經濟，大家可以留意返，李家超對香港人同國際受眾發出嘅信息將會出現矛盾。
• 政府與《東方日報》同《明報》嘅關係緊張：即使係對香港政府友好嘅新聞媒體，都因為政府對言論自由持續打壓公開表達不滿。《東網視頻》發布一條關於警暴嘅短片，報道1月初有警員喺坪洲向兩名手無寸鐵嘅男子開槍，其後受警隊批評。《東方日報》於2月3日以「監察乃傳媒天職 警方非聲大正確」一文回應，亦借「反中亂港」嘅《蘋果日報》批評「只准唱好不准批評算是甚麼新聞自由？」另外，政務司司長陳國基於1月初亦曾批評，《明報》發表關於《國安法》釋法嘅尊子漫畫係「偏頗、誤導、並且失實」。 大家可以繼續留意香港官員之後對甚至係溫和嘅傳媒仲有咩嘢口頭攻擊同批評，亦可以觀察香港其他媒體嘅反擊。
• 「47人初選案」審訊結果： 「47人 」中，16名被告唔認罪，佢地嘅審訊預計將持續90日。認罪嘅人中，至少有4人將以污點證人身分出庭指證其他曾經係同路人嘅被告。而已認罪嘅被告都會喺審訊完結之後判刑，其中包括學者戴耀廷、黃之鋒等著名民主派社運人。 除了最後嘅判刑外，我地亦要關注審訊過程中，任何違反正當程序嘅行為，兼留意埋判決會為香港僅餘嘅民主社會帶嚟乜嘢更廣泛嘅影響。