六四維園悼念活動搞手被定罪；奧斯卡爭議；香港有新網媒創立

 今期焦點：

• 再有前支聯會成員同前職工盟成員因《國安法》被捕
• 奧斯卡頒獎典禮有關香港嘅爭議
• 香港在國際自由評估中嘅排名下降
• 港澳辦重組，中共有機會再收緊控制香港

 法治

• 三名前支聯會成員被判罪成：香港法院裁定鄒幸彤、鄧岳君及徐漢光因沒按國安警要求提交資料，於三月四日被判「沒有遵從通知規定提供資料罪」罪成。三人曾經係前香港市民支援愛國民主運動聯合會（支聯會）嘅常委成員。直至2019年為止，支聯會每年都會喺香港維園舉辦六四燭光晚會，悼念1989年天安門事件。燭光晚會每年吸引數以萬計嘅人參加，但喺COVID-19嘅防疫措施下，當局已連續幾年禁止舉行六四燭光晚會，而支聯會亦已經喺2021年解散。控方指控支聯會係「外國代理人」，並試圖調查佢哋同其他海外民主組織嘅聯繫。幾位前支聯會常委成員，包括鄒幸彤，否認控罪。三名被告已被判入獄四個半月。同時，鄒幸彤，連同已解散嘅前支聯會主席李卓人及前副主席何俊仁，被控違反《國安法》下嘅「串謀顛覆國家政權罪」。
• 前職工盟秘書長鄧燕娥及一名發布香港獨立訊息嘅女人被國安拘捕：維護勞工權益嘅資深社運人鄧燕娥，3月9日探完丈夫——李卓人監後，喺赤柱監獄外，以涉嫌「勾結境外勢力危害國家安全罪」被捕。有報道指，左報《文匯報》早已安排記者喺監獄外等候，影低鄧燕娥被捕嘅畫面。早前，鄧燕娥亦曾被親中嘅《大公報》指控佢喺擔任亞洲專訊資料研究中心嘅董事期間，接受外國資金，親北京陣營亦曾主張應拘捕佢。同日，另一個女人因喺出post主張香港獨立，以涉嫌「分裂國家罪」被捕。呢兩次拘捕行動係過往十個月嚟，首次關於《國安法》嘅拘捕，亦係繼李家超成為香港特首後嘅首例。鄧燕娥於3月11日保釋，佢嘅胞妹鄧燕梨、同律師何俊麒，亦於同日因涉嫌「串謀妨礙司法公正罪」被捕。據報，兩人喺警方執行搜查令、搜查鄧燕娥屋企期間被拘留。

新聞自由

• Coconuts HK結束營運：獨立新聞媒體 Coconuts Hong Kong 3月1日宣布，喺香港面臨越嚟越多嘅新聞同商業挑戰，決定停止其新聞網站嘅所有更新。呢間網媒曾經憑廣泛報道2019年反修例運動、深入報道、同報導其他本地新聞而受到肯定。而Coconuts將會繼續經營馬來西亞、新加坡、同其他亞洲地區嘅新聞網站。

學術及藝術自由

• 奧斯卡頒獎典禮關於香港嘅爭議：香港社運人湯偉雄發起網上請願，要求喺3月12日舉行嘅奧斯卡頒獎典禮，取消邀請甄子丹擔任頒獎嘉賓，行動喺兩週內收集到10萬個簽名。甄子丹係香港武打明星，早前稱2019年反修例運動為「暴動」，仲喺3月初獲委任港區全國政協委員。同時，影星楊紫瓊成為首位奧斯卡亞裔影后，創下歷史紀錄，佢致詞時感謝香港、稱香港係佢當年開展職業生涯嘅另一個家。香港文化體育及旅遊局局長楊潤雄經官方發文祝賀，稱楊得獎彰顯咗香港演員同香港電影圈嘅實力。不過，有香港社運人認為，楊得獎突顯嘅唔係香港喺世界上嘅獨特歷史同文化地位，而係近年嘅政治打壓收窄咗香港嘅藝術自由。

抗爭行動特寫

• 被告庭上反駁法官稱檢控本身已政治化：3月11日，鄒幸彤被裁定違反《國安法》罪成，判刑前鄒喺庭上陳詞，堅決否認支聯會係外國代理人嘅指控。佢話「無論喺國內抑或全世界，所謂『國家安全』將無可避免成為人民權利同安全嘅威脅。就好似天安門、新疆、烏克蘭同香港嘅情況一樣。」佢陳詞仲寫明「如果必須的話，你就對我們的不服從宣判；但當權力的行使是建基於謊言，我們生而為人只能不服從。」鄒嘅發言後來被海外媒體報道，亦有海外民主組織分享佢嘅陳詞。
• 香港本地新網媒創立：2月20日，傳媒人蔡玉玲同舊行家創立新網媒《集誌社》（The Collective HK），旨在喺香港新聞自由日益萎縮嘅時代，要「深入求真」。《集誌社》集合來自各大傳媒包括《蘋果日報》、《香港01》、《有線電視》同《立場新聞》等嘅資深傳媒人，將專注深入調查剖析新聞議題。另外，《香港電台》前編導——蔡玉玲因製作「元朗7.21襲擊事件」嘅專題報道時，用車牌查冊而被控兩項「虛假陳述罪」，佢正向終院申請上訴許可，將會喺5月3日開庭。
• 香港於多個國際自由評估中排名每況越下，被聯合國委員會批評：最近香港喺多個權利同自由指數嘅評估中排名下跌。喺2022年無國界記者（Reporters without Borders）《新聞自由指數》（ Press Freedom Index ) 報告中，香港喺180個國家中，排名第148位，而喺英國經濟學人智庫 (The Economist Intelligence Unit) 嘅《全球民主指數》( Global Democracy Index ) 中，香港喺167個國家當中，排名第88位。另外，根據V- Dem（Varieties of Democracy）《自由民主指數》( Liberal Democracy Index ) 報告，香港喺179個國家裡面，排名第123位。而喺自由之家 ( Freedom House ) 嘅《2023年世界自度報告》( Freedom in the World 2023 report ) 中，香港只係獲得100分裡面嘅42分，自2018年以嚟，下降左17分。除此以外，香港更被全球研究組織公民社會監測（CIVICUS Monitor）發布嘅《2022年受威脅的公民力量報告》（People Power Under Attack 2022）報告中，由「受壓抑」（repressed) 降級到 「被封閉」(closed)，去到最低評級。3月6日，聯合國經濟、社會和文化權利委員會敦促香港政府檢討《國家安全法》對司法獨立嘅影響，並建議香港當局「立即為維權人士、公民社會社運組織及人、同埋記者提供所有正當程序嘅保障」。

持續監察事項

• 中共收緊對香港嘅控制：北京喺「全國兩會」完結後發表議案，主張重組國務院港澳事務辦公室（港澳辦），指港澳辦由向國務院匯報，改為直接向中共中央匯報。新辦公室正式改名做「中共中央港澳工作辦公室」，仲可能已新增更多監管特區嘅職務。中央政府已將2023年底定為完成重組程序嘅期限。同時，香港特首李家超，據報與新任外交部長秦剛會面時，要求中國外交部喺香港涉外事務中，繼續提供更多指導和支持。請繼續留意新嘅港澳辦公室結構、同佢嘅職務變化，監察北京點樣加強介入香港嘅政治同管治。
• 香港針對檢控社運人嘅家庭成員及支持者：繼前職工盟成員鄧燕娥（佢本人亦係一名政治犯嘅妻子）嘅胞妹、同知名律師何俊仁嘅細佬被捕後，大家可以繼續留意之後檢控同追究社運人親屬、律師、或支持者嘅法律行動。 3月17日，有兩個男人因持有《羊村》兒童系列書籍被捕。香港政府將呢啲書嘅內容理解為社運嘅隱喻、有「煽動意圖」。法律界有人話，呢次拘捕可以見到「僅僅管有煽動性刊物都係刑事罪行，係將煽動性刊物視為與毒品、武器、炸藥、假鈔及兒童色情等同等級別」，成為令人擔憂嘅先例。《羊村》出版商舊年9月已被判入獄19個月。大家可以繼續留意香港政府以煽動同國安罪名，加強滅聲嘅手段。
• 三八國際婦女節遊行被取消：香港僅存嘅民主政黨之一——社會民主連線（社民連）稱，成員喺3月3日被警方盤問，話佢地唔可以參加原定兩日後舉行嘅三八國際婦女節遊行。呢次遊行本來係香港三年嚟，撤銷COVID-19防疫措施後，首個獲警方批准嘅遊行，但當日冇任何遊行人士出現喺遊行嘅集合點。相反，只有數十名警察駐守喺活動起步點。主辦單位香港婦女勞工協會喺3月8日發表聲明，表示已「被迫取消」活動，但冇再嘅解釋原因。香港解除COVID-19防疫措施後，對集會自由嘅限制將會繼續存在，包括過去唔算政治敏感嘅社會公義等議題，都可能冇例外，我哋應該繼續留意事態發展。