北京釋法凌駕香港法院判決，加強眾籌規管，海外組織嘅倡議事項

 今期焦點：

• 北京釋法凌駕香港法院允許聘用海外律師嘅判決
• Google拒絕審查民主運動歌曲嘅要求
• 英國團體為黎智英案發聲
• 香港新聞媒體將報導下架

北京釋法凌駕香港法院判決，加強眾籌規管，美國科技公司面臨審查困境

隨著喺中國嘅抗議活動激增，中國共產黨喺12月放棄一直堅持嘅動態清零政策，開放通關。同時香港亦取消大部分防疫政策，其中包括限制性隔離。港府繼續打壓為民主發聲嘅黎智英，香港嘅法治進一步受到侵蝕。與此同時，香港前支聯會副主席鄒幸彤「煽惑未經批準集結罪」上訴得直，鄒早前因其Facebook言論觸犯咗煽惑他人明知而“非法參與未經批准集結”罪，被判囚15個月。可惜，鄒幸彤喺被撤銷定罪及判刑之前，已經就快完成服刑; 現時，鄒仍然有機會面臨令佢身陷囹圄嘅控訴。其他更新包括：

法治

• 北京釋法凌駕香港法院允許聘用海外律師嘅裁決：12月30日，北京嘅中國人大常委會就《港區國安法》頒佈釋法，稱法院必須獲得香港行政長官或監督委員會嘅批准，先可以容許海外律師處理國家安全案件。較早前，繼香港終審法院裁定允許經常批評政府嘅《蘋果日報》始創人黎智英聘用英國律師代理佢嘅《國安法》案件後，香港行政長官李家超要求中國人大常委會介入釋法。中國人大常委會嘅釋法凌駕咗地方法院嘅判決，嚴重侵蝕香港嘅法治。同類嘅釋法行為，喺過去1997年至2016年期間，只出現過五次。
• 眾籌規管：香港財經事務及庫務局宣佈，將成立眾籌事務辦公室（CAO)去規管眾籌活動。喺2019-20年嘅示威活動中，有市民發起眾籌活動去支持被捕嘅示威者; 當局後來以洗黑錢罪名逮捕參與眾籌活動嘅人士。喺新規管下，個人及團體進行籌款活動之前，必須事先向CAO申請批核，審批標準將會包括審視活動有無危害“國家安全”嘅潛在可能。

網絡自由

• 多個app被下架，VPN被禁用 ：根據12月嘅一份報告顯示，香港嘅Apple App Store 係繼中國大陸及俄羅斯以後，第三最多App被下架嘅地方，有可能受到直接或自我審查所影響。另外根據人權組織Apple Censorship的最新調查發現，國安法實施後，已有53個VPN 喺香港嘅App Store 被下架。
• Google拒絕審查民主運動歌曲嘅要求：喺多次國際運動賽事中發生播錯國歌事件後，12月15日，Google回應表示，就住港府要求審查民主運動歌曲《願榮光歸香港》一事，佢哋唔會人為操控演算法嘅結果排序。香港官員及北京方面都譴責Google嘅立場。今次係繼港府計劃諮詢立法管理網絡安全，並且可能對海外公司加強監管以來，被Google 拒絕要求。

學術自由

• 港區國安法被納入《教師專業操守指引》內容：香港教育局喺12月推出《教師專業操守指引》，要求教師對國家安全要有「正確」嘅理解。喺2019年反修例運動期間，好多學生參與示威運動，並得到佢地嘅老師同情及支持後，當局就加強審查教師，指引教師不應灌輸「偏頗觀念」，不應鼓勵一啲「違反社會秩序」嘅言論，並且需要向學校管理層申報可能潛在嘅違法活動。

反制行動特寫

• 英國團體為黎智英案發聲：由去年12月至今年1月，自從北京否決俾擁有英國籍嘅黎智英聘用海外律師嘅權利以後，英國出現咗一浪聲援行動。去年12月底，7個在英港人組織呼籲倫敦制裁李家超及其他針對黎嘅官員。到1月初，黎嘅國際律師團隊致函英國首相辛偉誠（Rishi Sunak），要求緊急會面討論確保黎智英獲釋嘅可行性。1月10日，英國印太事務大臣卓雅敏（Anne-Marie Trevelyan）同團隊見面。兩日後，黎嘅兒子連同帶領國際律師團隊嘅御用大律師，喺倫敦出席左一個會員制嘅傳媒人組織The Frontline Club主持嘅活動。
• 在美組織促請華盛頓擴大移民代遇：上年12月，47個在美離散港人組織聯署公開信，要求拜登政府喺2月5號過期日之前，延續及擴大港人「延遲強制離境」（Deferred Enforced Departure)待遇。美國政府喺2021年8月宣佈，俾符合資格嘅香港人有18個月嘅「延遲強制離境」待遇。當中包括好多喺反修例運動後去左美國，而簽證又已經過期嘅港人。
• 德國跨黨派議員成立香港國會小組：12月中，一班來自德國四大黨派嘅議員，成立咗一個香港國會小組，專責跟進同制定策略去爭取香港嘅人權情況。其中一位始創成員表示，佢地要顯示香港議題並無消失於柏林嘅政治議程之中。
• 最新一期離散港人雜誌《如水》：第一本海外港人雜誌《如水》，最近推出左新一期內容。雜誌嘅中文名「如水」係來自2019至2020年間反修例運動期間，引用李小龍嘅金句所得來嘅。《如水》係2020年2月喺台灣創立，係一個保護香港人言論自由嘅平台。最新一期雜誌內容包括流亡溫哥華港人嘅抗爭、中國愛國電影嘅賺錢能力，以及對正宗嘅追求及香港民族嘅論述。

持續監察事項

• 香港新聞媒體將報導下架：1月4日，獨立網媒《眾新聞》停運一年後，關閉所有網上內容，包括佢哋嘅網站、Twitter、Facebook同instagram專頁。喺《立場新聞》及《蘋果日報》觸犯煽動罪及國安法嘅案件威脅影響底下，我哋可以繼續留意更多傳媒團體及獨立傳媒人持續將新聞報道下架嘅情況。
• 持續有報導示威運動嘅傳媒人被定罪：繼續有傳媒人因報導民主示威運動而被定罪：2022年再有法庭裁決，兩名特約記者因報導民主示威運動而被捕入獄。其中一名記者鄧卓儒，被裁定喺2019年11月期間「於公眾地方管有攻擊性武器罪」成。另外攝影師蔡健瑜早前被裁定非法集結罪成，其後成功上訴得直獲判無罪，惟至12月中，再次被回復原來嘅定罪及刑罰。我哋可以繼續留意，當局點樣靠住持續針對報導示威嘅傳媒人，去懲治香港嘅獨立及特約媒體。
• 就住中國外交官員暴力行為採取更強硬態度：繼10月16日，有中國外交官員喺駐曼徹斯特中國領事館外毆打香港示威者後，6名涉事嘅外交官員，包括被拍到參與襲擊嘅總領事鄭曦原，都已經離開英國。佢哋離開之前，倫敦當局曾經要求北京免去6名外交官員嘅豁免權。我哋可以繼續留意各國政府點樣加強應對中國外交官員，喺各地違反當地法律嘅行為，尤其要仔細監察中國設於各地嘅「海外警察局」，點樣無視當地執法部門平衡運作。