《香港傳媒快報》創刊號：《立場新聞》案審訊、反習海報出没立法會、流亡記者協會成立

本期焦點：

• 《立場新聞》案審訊出現程序問題腰斬，前總編輯獲准保釋
• 新廣播處長返咗工一個月，話香港電台要同警方「合作無間」
• 韓國欖球比賽播香港抗爭歌
• 海外香港傳媒專業人員協會成立
• 民主派初選案一月開庭

《立場新聞》案審訊；新任廣播處長空降香港電台；《南華早報》抽起維吾爾族報道；濫用煽動罪

過去嘅一個月，習近平展示咗佢對中國大陸同香港完全統治嘅決心。佢喺中共二十大發表嘅講話中，表示由北京推動嘅「愛國者治港」方針，令香港「由亂到治」。香港行政長官同其他政客，透過社交媒體同新聞發佈會宣傳習近平嘅信息，無視習近平政權大力收窄人權保障同港人基本自由。即使大陸及海外學生同人民，參加咗中共二十大前幾日（即10月13日）舉行嘅全球反習近平嘅海報運動、響應四通橋抗爭，香港媒體都幾乎冇報道。 過去一個月關於新聞自由同表達自由嘅其他更新包括：

主流媒體最新發展

• 《立場新聞》案審訊出現程序問題腰斬，前總主編輯獲准保釋：現已停運嘅獨立網媒——立場新聞同兩名總編輯被控「串謀發布煽動刊物罪」，10月31日開審。幾日後，即係11月7日，前署任總編輯林紹桐被還押近一年後獲准保釋。原因係檢方喺審訊過程中提交1500頁新文件作為證據，令辯方冇時間審查，當中包括國安警由《蘋果日報》關閉日起截取嘅文章截圖。案中嘅另一名總編輯鍾沛權冇申請保釋，仍被拘留。下一次聆訊將於12月舉行。
• 新廣播處長返咗工一個月，話香港電台要同警方「合作無間」：香港電台（港台）新負責人、即廣播處長張國財於10月初上任。佢冇傳媒經驗，只係曾經喺布魯塞爾擔任香港經濟貿易事務辦事處、駐歐盟特別代表。11月10日，張國財喺Facebook節目中接受保安局長鄧炳強嘅訪問，被問及2020年傳媒與警方之間嘅「緊張」關係時，佢直言未來要與警方同其他政府部門「合作無間」。香港電台之前曾獨立同有批判性咁報道香港嘅事件，後遭政府接管。
• 記者喺《南華早報》抽起維吾爾族新聞故事後辭職：《南華早報》一名前編輯喺10月透露，佢同另外兩名記者喺2021年辭職，原因係一名高級編輯抽起咗佢哋關於新疆節育政策嘅三部分系列文章。就住中國政府對維吾爾人同其他穆斯林犯下種族滅絕同危害人類罪嘅指控，圍繞住節育政策嘅證據係眾多論據之一，聯合國人權事務高級專員亦曾經用嚟提出相關指控。即使《南華早報》有其他獨立報道，阿里巴巴係背後老闆嘅事實，仍然一直令人擔心。

表達自由嘅案件

• 關於煽動叛亂嘅拘捕行動和定罪仍然繼續：香港人繼續面臨殖民時代煽動叛亂罪嘅威脅，隨時面對拘捕，被限制言論自由。10月25日，香港警方因一名姓石嘅中國大陸男子張貼有關北京四通橋抗爭嘅海報、並喺社交媒體上分享，將佢逮捕。警方聲稱呢啲內容可能激起對國家主席習近平嘅仇恨或藐視。10月17日，經常出席民主抗爭者審訊嘅牧師彭文源同趙美英，分別因喺法庭上鼓掌同批評法庭對一名社運人嘅判決，被判12個月同3個月徒刑。

反制行動特寫

• 香港倡議團體譴責銀行家參加峰會：10月，一群總部設喺美國嘅香港倡議團體喺一封公開信中譴責美國銀行管理層出席香港政府舉辦嘅峰會。峰會於11月2日開幕，其中包括因侵犯人權而受到美國政府制裁嘅香港行政長官李家超有分出席嘅活動。倡議團體嘅譴責得到美國國會議員Jim McGovern 嘅支持，佢話銀行家出席峰會嘅舉動令政府對民主運動同人權嘅打壓顯得正當。
• 海外香港傳媒專業人員協會成立：10月31日，一個總部設喺英國嘅新組織成立，以協助被迫移居海外嘅香港傳媒人同埋留喺香港嘅記者，並為佢地提出倡議。協會得到國際新聞工作者聯會嘅資助，另外亦同無國界記者、同代表英國及愛爾蘭記者嘅工會——全國記者工會（National Union of Journalists）合作。
• 韓國欖球比賽播香港抗爭歌：11月13日，香港對韓國嘅亞洲欖球七人系列賽喺韓國仁川市舉行，開幕禮國歌環節上，主辦方播出2019年民主抗爭者嘅非正式「國歌」《願榮光歸香港》。主辦方其後道歉，聲稱呢首歌係由網上錯誤下載嘅。香港政府譴責事件，但拒絕公開宣布《願榮光歸香港》係非法歌，同時教育局又禁止歌曲喺學校播放。

持續監察事項

• 民主派初選案一月開庭：參與2020年非正式初選嘅17名香港民主派人士決定唔認罪，審訊喺1月初開審。而喺此案中被捕嘅另外30人已經認罪，而家等緊判決。我地應持續觀察冇陪審團嘅審訊會尊重正當程序權利、定係會變成偽審訊。
• 香港圖書館進一步收緊限制：香港大學引入咗一個新系統，被視為政治敏感嘅書，例如民運人士撰寫嘅書或有關1989年天安門大屠殺嘅書，喺未註冊嘅情況下唔可以借閱。同時間，香港嘅公共圖書館發起了兩次寫作比賽，寫明禁止被視為危害國家安全嘅作品參賽。我地應持續關注不斷增加嘅借書同圖書館限制，監察以唔清唔楚嘅國安理由、禁止表達和獲取信息自由嘅行為。
• 親北京嘅香港團體被踢出Facebook：10月30日，Meta以未指明嘅「社群違規行為」為由，下架咗親北京嘅熱門Facebook群組「Save HK救救香港」。呢類下架曾經喺2021年初打擊過親政府團體同反政府團體，包括下架「Save HK救救香港」前身「Save HK」。我地應該持續關注社交媒體上，就香港用戶作出嘅不透明內容審查和下架措施，因為呢啲平台仍然係香港自由表達嘅開放渠道。