香港示威聲援內地反封控防疫政策運動

 今期焦點：

• 港人聲援中國大陸反封控示威
• 六四集會案更新
• 黎智英案就快開審前《蘋果日報》高層認罪
• 被裁定有煽動意圖兒童繪本《羊村》發佈網上版
• 政府就住國歌搜尋結果向Google表達不滿

香港示威聲援大陸反封控反清零政策運動

早兩個月，新疆烏魯木齊大火，令至少10個人死亡，掀起中國各地爆發大規模示威。共產黨領導人習近平主張嘅「動態清零」防疫封控政策，明顯阻礙咗救援行動。大火引發民憤，當中包括抗議中央政府及要求習近平下台嘅聲音。自由之家 (Freedom House)的《異言網》（China Dissent Monitor)由6月起已追蹤倒有關新冠防疫政策嘅抗議行動，至今大約有80宗，反映民間早已出現不滿嘅情緒。隨住示威擴散全球，香港亦有聲援行動 。大陸爆發示威幾日，北京就宣布放寬防疫限制。以下有更多關於示威及其他事件嘅更新：

表達自由

• 港人聲援中國大陸反封控示威：烏魯木齊致命大火，掀起中國各地爆發大規模示威 。11月28日，幾十個香港人聚集中環，悼念11月24日於大火喪命嘅10名死難者，係自從2020年《國安法》實施後少有嘅場面。根據香港傳媒報道，有大概30名警察截查示威者身分證，當中包括有舉白紙嘅示威者。港人其實亦曾經喺《國安法》實施後利用過白紙抗議。大陸嘅示威者正係利用同樣方法抗議，象徵政府嘅言論審查。因此大眾稱之為「白紙運動」或者「A4革命」。香港大學、中文大學、同埋科技大學都有包括內地生在內嘅學生加入今次聲援大陸示威民眾嘅運動。
• 六四集會案更新：前支聯會主席李卓人，被指違反《港區國安法》嘅「煽動他人顛覆國家政權」罪候審，12月6日高院申請保釋被拒。同案嘅何俊仁同前支聯會副主席鄒幸彤，亦會面臨無陪審團嘅審訊、同埋可能長達10年嘅監禁。支聯會解散前，每年都有舉辦六四燭光悼念晚會。同日（ 12月6日）鄒幸彤出席另一聆訊，佢哋三個人被指控「沒有遵從通知規定提供資料罪」。警方國安處指控支聯會係「外國代理人」，並於2021年9月要求支聯會提交成員資料、財政及活動紀錄等，被支聯會拒絕。
• 612人道支援基金案信托人罪成：於2019年為支援反修例抗爭者而成立嘅612人道支援基金，幾位信托人被指行政違法，冇遵從《社團條例》要求、為基金註冊成為合法社團，法庭於11月25日裁定罪名成立，判基金信托人各罰款4000港元。幾位信托人包括支持民主運動嘅天主教香港教區榮休主教陳日君樞機、前立法會議員何秀蘭、大律師吳靄儀、同埋歌手何韻詩。同時佢哋因涉嫌干犯《港區國安法》「串謀勾結外國勢力或者境外勢力危害國家安全罪」被調查，護照仍然被沒收。

港媒最新發展

• 黎智英案就快開審前《蘋果日報》高層認罪：11月22日，《蘋果日報》六名高層，包括前總編輯，承認「串謀勾結外國勢力罪」，以換取較輕刑罰及撤銷煽動嘅控罪。幾名被告因報章刊登提倡制裁香港官員資訊，有機會面臨終身監禁嘅刑罰。另外，幾名被告同意會喺黎智英原定於12月舉行嘅審訊中作供。該審訊原先被押後至12月13日，期後黎智英國安案獲高院批准聘用英國御用大律師後，政府又申請將案件押後至2023年9月。行政長官李家超立即就《國安法》提請人大釋法，限制海外大律師提供法律意見。利用釋法去推翻香港法庭判政府敗訴嘅判決係罕有嘅做法，如果人大真係釋法干預判決，將會證明香港失去法治。
• BBC停播粵語時事節目：11月5日起，英國廣播公司BBC停播粵語節目《時事一周》。節目主要回顧國際、英國及中國時事，2021年2月起喺YouTube同各大podcast平台有得聽。香港電台喺政府收回編輯自主權之前，都曾經轉播呢個節目。節目停播對獨立粵語新聞嚟講係個好大嘅打擊。

網絡自由

• 在美港人組織網站被封鎖：10月26日，在美港人組織「香港民主委員會」（HKDC）呼籲留意某啲國際企業喺香港境內嘅活動後，網站喺香港被局部封鎖。根據Freedom House數據顯示，喺《國安法》實施後，至少有九個網站被封鎖。

反制行動特寫

• 香港外國記者會暫時獲續約：香港外國記者會獲港府續約，由2023年1月起生效，為期三年。記者會曾經邀請過備受爭議嘅講者演講，而原本七年嘅租約就快期滿，所以有人擔心港府會收回會址。新嘅租約加入咗「標準嘅」國家安全條文，令政府可以隨時收回會址，同時或會引致記者會自我審查。《國安法》實施後，記者會曾於四月取消人權新聞獎，引致幾位會員辭職，以示抗議。
• 多個香港流亡海外團體聲援內地示威者：世界各地52個流亡海外團體發表聯合聲明，聲援大陸抗議中國共產黨嘅施政，表示「跨境團結比以往任何時候都更加重要」。
• 倫敦地方議會否決區內興建中國大使館：12月2日，倫敦哈姆雷特塔自治市議會（London borough of Tower Hamlets ）否決北京申請，喺前英國皇家鑄幣廠舊址，興建喺英國最大嘅中國超級大使館。當地居民去信議會反對規劃申請，同為該區居民嘅香港流亡人士鄭文傑亦有到議會發言，擔心計劃令住喺當地嘅香港人、維吾爾人、西藏人同華人嘅「安全及個人資料」受到威脅。該區戰略發展委員會仍需就申請進行討論。
• 被裁定有煽動意圖嘅兒童繪本《羊村》發佈網上版：9月，身處海外嘅羊村團隊喺網上發佈一套三本羊村系列繪本，每本都有粵語版、台灣國語版及英文版。故事內容講述卡通羊群對抗狼群，同月最終令5名香港言語治療師被判「串謀刊印、發佈、分發、展示或複製煽動刊物」罪，各被判入獄19個月。
• 美國博物館展出最後一分《蘋果日報》嘅英譯版：美國緬因州第一修正案博物館舉行網上展覽，展出2021年6月24日最後一分《蘋果日報》，仲提供咗英譯版本。

持續監察事項

• 政府就住國歌搜尋結果向Google表達不滿：香港特區政府話，已經同Google及其附屬平台YouTube交涉，要求更改搜尋器嘅演算結果，令2019年抗爭歌《願榮光歸香港》唔再置頂。呢首歌之前喺幾個大型運動項目播出，但現時香港其實係冇自己嘅正式區歌，如要喺國際場合播歌代表香港，要播中國國歌《義勇軍進行曲》。我哋觀察到Google搜尋器結果有變更陸續出現，大家可以繼續留意。同時，面對政府嘅壓力或者威脅，其他科技公司亦有可能調整搜尋結果演算法。
• 局長「顏色革命雛形論」受質疑：香港保安局局長鄧炳強早前稱內地反封控抗議示威出現「顏色革命」嘅雛形，流亡海外傳媒人曾志豪12月2日喺本地報章《明報》發表一篇評論，質疑鄧嘅講法。同一日，政府發聲明反擊曾嘅言論，網媒《香港01》亦同時刪除咗一篇有關「北京四通橋抗議」嘅文章，距離當日上載時間只有6個鐘。我哋可以繼續留意香港傳媒界嘅編輯同記者點樣進行自我審查，同埋點樣喺政治紅線之間遊走。
• Trust Project暫停喺香港營運：The Trust Project係一個致力宣揚新聞報道嘅透明度、準確性、同誠信度嘅國際新聞團體協會，佢哋已經暫停喺香港嘅營運。《南華早報》於2020年係本地第一間、仲係唯一一間亞洲報章成為協會會員。我哋可以繼續留意倡議同樣理念嘅其他團體，喺《國安法》下扭曲嘅香港傳媒生態之中，會唔會遇上同樣困境。